Samichlausevärsli - Klassiker, Teil 2

1. Samichlaus, Du liebe Maa,
   mues ich jetzt go füre staa?
   Gäll, Du bisch nöd bös mit mir,
   weisch ich han ächli Angscht vor Dir.
   Gfolget hani scho nöd immer,
   s'git no Sache, diä sind schlimmer!
   Gäll, das wämmer jetzt vergässe,
   lieber Schnitz und Bire ässe.
   Gäll, ich dörf jetzt wieder gaa,
   Samichlaus Du liebe Maa.
   
    
2. Samichlaus Du guete Maa
   ändlich bisch Du wieder da.
   Chonsch cho luege, was ich mache
   wien ich spiele, singe und lache.
   Tuesch mich lehre, s’ Härz zverschänke
   und e chli a anderi dänke.
   Nur so bin ich sälber froh
   unds Christchind cha zumer cho.
   
    
3. Samichlaus es isch halt schwär all Tag artig zsi,
   Secher chunsch Du hüt bi mir mit em grosse Buech verbii.
   Ned immer isch mir sFolge glunge, sowie igs ha wöue,
   Gäu Samichlaus Du weisch es scho, i muess dir nüt verzöue.
   Wenn aber a dim grosse Sack nümm so schwär wettsch träge,
   so würd i für e hampfle Nüss härzlech Danke säge
   
    
4. Oh Samichlaus, wie simmer froh
   Bisch wieder einisch zu eus cho
   Mir gsehnds aa dine Auge aa
   Häsch au es bitzeli Heiweh gha
   Um hüt mit dine guete Sache
   All dini Chinde glücklich z'mache
   Ich hann scho g'fürchtet, Du sigsch am Änd
   Will d'Mänsche hütt Ragete händ
   Zum Mond ufe, mit Apollo Drei
   Und chömisch nie meh zu Eus hei
   Das würded alli libe Chinde
   Uf eusere Ärde trurig finde
   Für eusi Wält, mer weisses ja
   Bisch Du de einzig richtig Maa
   Und wämer dänn emal am Änd
   Uf Erde Glück und Friede händ
   Dänn chasch du au mit Sack und Fitze
   Vo mir us uf de Mond ufe flitze
   Gott Lob und Dank bliibsch Du bii eus
   Und überlahsch de andere Chläus
   De Mond und sämtlichi Planete
   Es hätt ja doch kein Chinde dete
   Und wos kein Chind hät, gibs nur zue
   Da häsch du herzlich wenig z'tue.

Wir wünschen Ihnen einen schönen Samichlausetag.